జర్నలిస్టుల పిల్లలకు 50% ఫీజు రాయితీ ఇవ్వాలి... కలెక్టర్‌కు కాకినాడ సిటీ ప్రెస్ క్లబ్ వినతి

కాకినాడ జిల్లా : జిల్లాలో పనిచేస్తున్న వర్కింగ్ జర్నలిస్టుల పిల్లలకు ప్రైవేటు పాఠశాలల్లో ఈ విద్యా సంవత్సరానికి 50 శాతం ఫీజు రాయితీ కల్పించాలని కాకినాడ సిటీ ప్రెస్ క్లబ్ కార్యవర్గం జిల్లా కలెక్టర్ హరేంద్ర ప్రసాద్‌ను కోరింది. ఈ మేరకు క్లబ్ అధ్యక్షుడు రెడ్డిపల్లి రాజేష్ ఆధ్వర్యంలో సీనియర్ జర్నలిస్టులు అంజిబాబు, శ్రీనివాస్, బాబ్జి, సతీష్, నారాయణ తదితరులు కలెక్టర్‌కు వినతిపత్రం అందజేశారు. ఈ సందర్భంగా వారు మాట్లాడుతూ, నిత్యం వార్తల సేకరణలో నిమగ్నమై ఉండే జర్నలిస్టులు తక్కువ వేతనాలతో జీవనం సాగిస్తున్నారని, వారి పిల్లల విద్యాభారం తగ్గించేలా ఫీజు రాయితీ అమలు చేయాలని విజ్ఞప్తి చేశారు. గతంలో పలువురు కలెక్టర్లు జర్నలిస్టుల పిల్లలకు ఈ సదుపాయం కల్పించారని గుర్తు చేశారు. దీనిపై జిల్లా కలెక్టర్ సానుకూలంగా స్పందించినట్లు వారు తెలిపారు.