కేబుల్ న్యూస్ చానళ్ల కేంద్రాల్లో అక్రిడిటేషన్ కమిటీ తనిఖీలు

కాకినాడ :: జిల్లాలోని వివిధ కేబుల్ న్యూస్ చానళ్ల నిర్వహణ, ప్రసార వ్యవస్థలు, మౌలిక వసతులపై అక్రిడిటేషన్ కమిటీ ఆధ్వర్యంలో బుధవారం తనిఖీలు నిర్వహించారు. జిల్లా కలెక్టర్, అక్రిడిటేషన్ కమిటీ చైర్మన్ హరేందిర ప్రసాద్ ఆదేశాల మేరకు ఈ వెరిఫికేషన్ ప్రక్రియ చేపట్టారు. అక్రిడిటేషన్ కమిటీ సభ్యులు జిల్లాలోని వివిధ న్యూస్ నెట్‌వర్క్ కేంద్రాలను సందర్శించి అక్కడి ప్రసార వ్యవస్థను పరిశీలించారు. ముఖ్యంగా ఆయా సంస్థల్లో ఏర్పాటు చేసిన స్టూడియో, సర్వర్ రూమ్, టెలికాస్టింగ్ విభాగాలు, ప్రసార సాంకేతిక పరికరాలు, కార్యాలయ మౌలిక వసతులు తదితర అంశాలను క్షుణ్ణంగా తనిఖీ చేశారు. న్యూస్ చానళ్ల నిర్వహణకు సంబంధించి అందుబాటులో ఉన్న సాంకేతిక సదుపాయాలు, ప్రసార కార్యకలాపాల నిర్వహణ విధానం, స్టూడియోలోని ఏర్పాట్లు, సర్వర్ రూమ్‌లోని సాంకేతిక వ్యవస్థ, టెలికాస్టింగ్‌కు సంబంధించిన పరికరాలు తదితర అంశాలను కమిటీ సభ్యులు పరిశీలించారు. సంబంధిత వివరాలను నమోదు చేసుకుని, నిబంధనల మేరకు వెరిఫికేషన్ ప్రక్రియను కొనసాగించారు.

ఈ తనిఖీల కార్యక్రమంలో సమాచార శాఖ డిప్యూటీ డైరెక్టర్ బి. పద్మజ పాల్గొని, వివిధ న్యూస్ నెట్‌వర్క్ కేంద్రాల్లోని ఏర్పాట్లను పరిశీలించారు. అక్రిడిటేషన్‌కు సంబంధించిన నిబంధనలు, మార్గదర్శకాలకు అనుగుణంగా సంస్థల వివరాల పరిశీలనలో కమిటీ సభ్యులతో కలిసి ఆమె పాల్గొన్నారు. జిల్లాలో పనిచేస్తున్న మీడియా సంస్థల వివరాలను క్షేత్రస్థాయిలో పరిశీలించి, వాస్తవ పరిస్థితులను నిర్ధారించడంలో భాగంగానే ఈ వెరిఫికేషన్ చేపట్టినట్లు అధికారులు తెలిపారు. కమిటీ పరిశీలన అనంతరం నిబంధనల ప్రకారం తదుపరి చర్యలు చేపట్టనున్నట్లు పేర్కొన్నారు.